【關係出現呢4個變化,要學識放手令彼此自由】 | Love tips | 小月巴

girls-59

拍拖想要甜甜蜜蜜一世,但愛情好鍾意同人類開玩笑,係你以為幸福既時候,總會暗暗出現一些變數,當你或佢講出「分手」既一刻,再來反思同挽救已經遲左。其實感情降溫係有跡可尋,細心留意返你地之間有無出現以下既變化,可能代表你地已經開始厭倦,如果有心補救就要盡快!

1. 態度180度轉變
曾經你地好sweet,從來都唔會鬧交,佢好遷就你既小任性,你亦理解佢心情唔好既一兩句賭氣說話。但有一日開始,你地竟然會互相攻擊,小事化大,連早餐要食煎蛋定炒蛋都可以吵架,放假既好心情全部無曬。

又或者,你同另一半習慣鬥嘴,你串下佢懶,佢講下你無腦,朋友成日都叫你地停止耍花槍閃親佢地。某一日,你開始無再嘲笑佢做左傻事,佢亦因為你遞個電視搖控畀佢而講「唔該」,兩個人對眼已經無再幸福開懷既笑容,只剩低禮貌微笑。

2. 對方講咩都聽唔入耳
熱戀既時候,每分每秒都想見到對方,聽到佢既聲音,就算鬥嘴笑笑就無事。曾經你地每日傾三、四個鐘都嫌唔夠,就算話題再無聊,妄想、爛gag、八卦都傾得開心,甚至錄起對方既聲音當鬧鐘同鈴聲,被朋友嘲笑都唔怕。

而家佢覺得你講既說話都好無聊,唔想畀任何反應,廢話無視,有意義既對話都好不耐煩;或者你又認為佢每一句都好刺耳,動作太大聲你都覺得討厭。講一句電視劇拍得差,你就好嬲咁答「垃圾你又睇!」最想對方一粒聲都唔出。

3. 腦海第一個浮現既唔再係佢
唔知從幾時開始,你好多事都唔想同佢講,覺得講左佢都唔明,不如同返姊妹傾啦。今日有個presentation好重要,想佢同你加油,但你會煩到佢做野所以無講佢知。客人好欣賞你既報告,你又唔想同佢分享喜悅,其實拍拖邊有咁多顧忌。

想當初,你搶到新手機好興奮,即刻WhatApp就同佢講;被上司照肺,又想話畀另一半知道,想佢安慰你,陪你一齊鬧爆個衰人。開心唔開心既事都想同情人分享,幸福會乘二,傷心就可以減半,你地係咪好耐無分享過生活大小事啦?

4. 被放飛機反而開心
被人放飛機,你會嬲佢唔尊重你地既約會,或者知道佢公司有急事一定要處理所以唔呷醋,生氣或者體諒都係正常反應,但如果佢打畀你道歉,要加班所以陪唔到你食晚飯,而你竟然鬆一口氣,甚至少少暗爽。

因為你開始唔知點同對方相處,見到面大家都dead air。以前雞啄唔斷,就算大家唔出聲都唔會覺得尷尬,而家兩個人安靜得好壓迫,想搵話題傾下先發現原本你地已經無話可說。

激情漸退,又無法累積成親密感,兩個人越離越遠,應該係互相依存既關係如今只有拖拖拉拉,係時候要考慮放手先係對雙方最好既決定。

我要留言