【女孩們,唔好再為男朋友已讀不回而心煩】 | Love tips | 小月巴

pixta_14

訊息傳出去唔夠五分鐘,你已經拎起手機睇左三次,確定佢仍然未讀。終於係半個鐘頭後,當你第15次睇手機既時候,見到對方已讀、輸入中、下線,然後今日就陷入等候回覆既地獄,每秒都思考緊究竟佢本來要覆咩?點解突然唔覆?

你有無試過呢種情況?為左等一個回覆而全日心緒不寧。甚至你本來只係問男友今晚約幾點,但你緊張程度令人以為等通知手術結果。

多謝而家既通訊軟件,講求即時,變相要求使用者要即時覆機,因為覆WhatsApp而起爭執多無謂,太執著於「已讀不回」俾雙方太大壓力。

對方無讀,可能真係忙緊,或者放低左手機;已讀不回亦有機會係諗緊點覆,甚至打算做完野再覆但失左憶。你太心急於對方既回覆,於是永遠導向唯一既解釋:佢有問題。你覺得佢有心避你所以已讀不回,成日無讀訊息係瞞住你做錯事。

因為擔心,所以你連環轟炸,每次見面你都要質問佢點解唔覆機。佢係你男朋友,唔係999報案中心,一定要9秒內接起電話。雖然你地係情侶,但都唔適合太管束對方既行為,相信作為一個愛你既男朋友,都會希望你唔好擔心,而盡可能回覆你。

其實你有自己既生活,無必要將自己同對方綁埋一齊,WhatsApp係方便你地通訊,唔好變成破壞關係既原因。有重要事就打電話俾對方,揀得傳訊息既都係小事,就唔好太緊張啦!今日開始,停止每兩三分鐘check一次WhatsApp既壞習慣,手機放埋一邊,好好專心工作,集中返係同朋友既聚會入面,忙完一日,你就會發現原來對方幾時覆其實無咩大不了。

我要留言