【想過二人世界不結婚更好!香港情侶不婚的3個真相】 | Girl Power | 小月巴

pixta_17921524_XL123

當年難得貼地的TVB劇《缺宅男女》,一家九口三代人住係同一間屋,就算結左婚都無得二人世界的例子比比皆是。直到今日問題依然未解決,負擔不起的樓價、房租,等到天長地久的公屋,「廢青」們點敢諗結婚呢?

同老公家人一齊住?
婚後多數情況都係女方搬到男方屋企,香港地少人多,上一輩辛苦儲錢買樓,或者政府派公屋,其實都只夠一家幾口居住,有些人幸運有自己的睡房,兩公婆還有將來的孩子也算有個私人空間;但如果你見到男朋友一家三口係逼緊碌架床,一諗到自己將來生活,情到濃時想親熱都怕被老爺奶奶聽到很尷尬,逼狹的空間放大相處的困難,婆媳關係永遠唔會過時,連呼吸都辛苦又點會住得開心?只會即刻打消結婚的念頭。

pdvd_024_edit


樓價太貴上車無期
兩公婆想有愛的小窩奈何買唔起樓。香港堪稱全球最難置業的城市,今年樓價升幅仲要係全球第二高,升超過兩成如果係人工就好啦。以為搬入「大西北」地區有機會「上車」,大發展商話你知,好幾年前,屯門元朗樓盤呎價已經過萬;而居屋已經直逼私人樓價,就算抽到都未必買得起。大專畢業生普遍月入一萬,即係「公一份婆一份」,兩個人辛苦工作成個月先夠買一呎階磚,仲未計生活使費同家用呢?自己計下要幾耐先儲到三成首期?唉,諗來都心傷。

黃子華講過:「一萬蚊一呎,三百呎嘅樓係咪三百萬?當你儲到首期時已經唔係。」就算努力工作幾年,升職加人工到月入五六萬,或者每年去少幾次日本,與未來dream house的距離都唔會變近。除非「靠父幹」,但就算父母幫你俾首期,就算唔生仔,兩公婆都要供幾十年樓,成世人就被層樓困住,「無樓無高潮」未算刻薄,因為有樓都要愁一世。

20120216101329dd3f4

買唔起樓,咁租呢?
香港今年租金貴絕全球,房租升得快過人工,住劏房都要每月拎三四成人工交租,情侶同居,每個月都係幫房東供樓,仲邊敢諗結婚?想好似《西謊極落》租太空倉,得一個床位單身狗就算啦;拍緊拖既,好似戲中咁講:「點敢帶另一半上來」。無論你認唔認同游蕙禎的政治立場,有一點佢講得有道理,香港人而家的確係「扑嘢」的地方都無!你以為公園、巴士打野戰,難道真係咁多人追求刺激咩?

21432943_10155596706609462_5583661275373902855_n

打算排公屋,然後上樓有望嗎?
上網搜尋「排公屋」,見到一堆年輕人一滿18歲就申請輪候公屋的例子,你可以話佢地無大志,但單身人士上樓無期,排定先都係為求保障。公屋平均輪候時間係4.7年,即係話結左婚起碼要過4年幾同老公家人一齊住,或者捱4年貴租的日子。於是而家出現了分開住的夫妻。女方一星期有兩三日返娘家住,「七分四」的夫妻生活為兩公婆帶來喘息的空間,做人女兒的又可以多陪下屋企人,但失去左婚姻共同生活的原意。既然而家結婚同無結婚一樣,那為什麼還要結婚?

tinheng

圖片來源:香港房屋委員會及房屋署、華映娛樂、TVB

我要留言